القوي السياسية.... قوة الاخوان هي قوة مزعوة

صرحت القوي السياسية والائتلافات ولفيف الاعلاميين ان قوة الاخوان هي قوة مزعومة وبنجاح جمعة الغضب الثانية بغيابهم سقطت اسطورتهم.

حلو اوي الكلام ده يعني كده الاخوان نفرين تلاته وملهمش لزمة واحنا اللي ولاد لذينه, طب احنا بقا خايفين من اجراء الانتخابات في موعدها ليه مدام العالم الوحشة اللي خانوا الثورة ومبادئها  نفرين وملهمش لزمة وانضحك علي الشعب من الادارة السياسية ب استقتاء زورت فيه ارادة الشعب بخطاب ديني ونار وجنة وحور عين, استفتاء ملوش لون ولا طعم ولا ريحه ولكن انا مش هقعد اعيط ما خلاص اللي حصل اتنيل وحصل والغالبية قالت كلمتها, نقول احنا دول انضحك عليهم دول غلابة دول مش عارفين حاجة هما خلاص دلوقتي اغلبية,  هينط واحد ويقولي وفين ياروش حقوق الاقلية وفين احترام رايهم هي دية الديمقراطية اللي احنا عايزنها يارايق, سبوني انا ارد عليه خد ياد مين اللي قالك انه الاغلبية مش هتراعي حقوق او مش هتحترم اراء الاقلية, انا فاهمك كويس انت عايز الاقلية تسوق الاغلبية بحجة انه ده احترام ل الاقلية,انا بقا بقولك ياعم القور المرعاه ديه بتكون انه الاغلبية تراعي في سياستها وفي حكمها حقوق الاقليه وتساوي بينهم وبين الاغلبية في الحقوق والواجبات و تكون وظيفة الاغلبية هي الادارة في تطبيق رؤيتها وفي تنفيذ برامجها التي تقدمت بها والتي بها نالت ثقت الاغلبية بحيث لا تتعارض هذه السياسة مع الحقوق وايضا لا يقتصروا على ضمان حرية الأغلبية بس ولكن يؤكدوا على حرية الفرد بأنواعها وحماية بذلك الأقليات حتي لا يتعرضوا الاقليات للاضطهاد هي ديه الديمقراطية بعينها والمصحف, وبعدين هما فين والحكم فين هما مش في اديهم اي حاجة هما مثلي ومثلك لالالالالالالالالالالالالا هما شاغلين واحنا نايمين علي نفسنا وقاعدين نعيط.

لو مش عاجبكم كلامي ومش واكل معاكم  مش قدمنا غير اننا ننزل التحرير وهما ينزلو ا معانا ونقعد نخبط في بعض لحد ما يموت مننا تلات او اربع الاف وبكده الجيش هيطبق الاحكام العرفية وساعتها الانتخابات هتتأجل جامد الحل ده.

محدش يقولي طب تتاجل الانتخابات علشان الامن والنبي لانه مش ديه الحقيقة, الحقيقة انه احنا خايفين ورفضين انه الاخوان تسيطر علي مجلس الشعب لانه تاريخهم الملون و مواقفهم المصبوغه معروفه لينا  وبنجاحهم هيديروا الحياه التشريعية والسياسية وهــ يصيغوا الدستور.

وكمان احنا مش جاهزين عايزين الاحزاب تاخد فرصتها في تقديم برنامجها للناس والناس تتعرف عليها وتقارن مابينها وبين الاحزاب الاخري, قف عندك هنا دلوقتي كم يوم عدا من يوم الاستفتاء لحد انهاردة تقريبا شهرين, حد م الاحزاب او من السياسين نزل الشارع واتكلم مع الناس وقدم لهم روشته تخفف من اوجاعهم وتشيل عنهم الحمول وتزيل من عليهم الهموم, انا والله ماشفتهم غير في فنادق 7 نجوم لا علشان الحلفان 5 نجوم بس.

طب نشتغل احنا بقا وننزل الشارع ونقرب من الناس ونوعيهم ونعرف هما عايزين ايه ونقدم لهم حلول واقعية لمشاكلهم ونتقدم لهم بخطاب عاقل يتناسب مع حالتهم ........... نشتغل ياعني, معلش هنتعب شوية

مش اقعد جنب الحيط او في فندق سبع نجوم وقعد اقول الاخوان الاخوان الاخوان, وهما شاغلين نار ياقلبي وتيجي تكلمهم تقولهم الناس زعلانة الاعلام بيشتم فيكم, تلقيهم ولا هما هنا ويردوا عليك يقولوا الصندوق هو اللي هيتكلم لاننا معانا الناس البسيطة اللي في القري والشوارع و و و .......... 

وصل لكم يا جدعان اللي عايز اقوله وعرفنا هنعمل ايه الفتره الجاية وكل واحد عرف دوره ايه....انتشروا 

هارش ياذوق

التحالف بين الاخوان والاحزاب المعارضه ............ الإجابة يســــــــــرا

هي التورتة هتتقسم دلوقتي ولا كمان شوية, انا شايف انهم بدأو يقطعوا فيها, التورته كبيره اوي وفيها شمعه حمرة وشمعة بيضة والنيل ماشي في النص,الاخوان بقا واتناشر حزب اتجمعوا كده بالصلاه ع النبي واتفقوا علي ان يخوضوا الانتخابات البرلمانية المقبلة بقائمة واحده, وأشارت الجماعة إلى أن "التحالف يهدف إلى حشد القوى السياسية للعمل المشترك في الانتخابات المقبلة من أجل التحول الديموقراطي والنهضة الاقتصادية والتنمية الوطنية الشاملة خلال السنوات الخمس التي تبدأ مع تشكيل مجلسي الشعب والشورى الجديدين، وإعداد الدستور، باعتبارها أهم وأدق مراحل الوطنية المصرية في تاريخها الحديث، ولا يقوى فصيل سياسي واحد على تحمل مسؤولياتها والنهوض بتبعاته"  ايه الشغل العالي العالمي ده وايه الكلام الكبير اوي ده, ديه مش تورتة ده جمل يا اخوانا (اخونا تعني في القاموس عندي المصرين كلهم) ايه الكلام اللي جاي من المخميخ الجواني ده, حشد القوي وتحول ديمقراطي وتنمية وطنية واعداد دستور, طب وربنا ده انا هعيط, الاخوان مع الاحزاب الليبرالية فيلم الموسم ام الاجنبي, ده مش فيلم والله ده حاجه بجد حقيقي يعني مش جرافيك, نقطة و فول ستوب وكلمة ومن اول السطر, وحد يفهمني والنبي واللي يتكلم يعلي صوته ويقوم يقف علشان اسمعه, الاخوان واحزاب المعارضه كل منهم له مرجعيات وكل منهم مش قابل مرجعيات التاني وبقوا كلهم ايد واحده علينا وقابلين بعض وحبايب الـ ايه علشنا, ما علينا, انا هقوم اكمل نشر الغسيل, وراجع لكم,انــــــــــــا جيت يعني دلوقتي الاخوان مع الاحزاب هيبقوا قايمة واحده, يعني جماعة واحده, امال مين بالصلاة ع النبي اللي هيكون معارضة واللي هيحط العقدة في المنشار في تشريع او في قانون او اي في حاجة,يعني مين اللي هيقول ده غلط وده صح, من اللي هيقول لأ, محدش يقولي انت اللي هتقول, انا لسه سني مجبش سن الترشح لمجلس الشعب (علي الرغم اني شاب والشباب والمصحف هما الفتيله والعصب اللي قامت عليها الثورة وكان اولي او الاصح انه كان يتعمل كوته للشاب او يقللوا سن الترشح ل 21 سنه زي فرنسا, والشاب ابو 21 سنه ده لو نجح يبقا هو يستحق المنصب لانه في السن ده وعرف  يقنع الناس انه قادر علي تحمل المسئولية وبرنامجه كان واقعي واقنع بيه الشباب والشيوخ ), ما علينا نرجح للتورتة, هديك حته بس اصبر عليه شويه اخلص بس الاول, انا كنت واقف فين, ايوه افتكرت عند المعارضة, فبكده بقا البرلمان كله هيكون شلة واحده ومرر ياعم نافق ياسيدي قصدي وافق ياسيدي, انا بعد الثورة فرحت وقلت الدنيا هتديها احزاب وكل حزب من دول هيكون جوه المجلس اسد الفرات, صقر المعادي, طلعوا كلهم (....), انا ياجماعة عاجبني شغل الاخوان اوي, اديهم مني ياسيدي واحد لايك, لأ بجد ناس عارفه هتاكل التورته منين ومن اي حته ومين اللي هيمسكلها السكينة ومين اللي هيمسكلها الطبق, عل الرغم انها شايفه وفي ناس كتير شايفه معاها انه لوحدها قادرة انها تشيل الليله وتحاسب ع الطلبات وتودي الاكل اللي هيتبقا ع البيت, لكنها بتلعب صح لمصلحتها ممكن او لمصلحة البلد ممكن برده, هي لسه شايفه فيلم الحزب الوطني اللي قعد يتعرض لــ 30 سنه والناس كانت قرفانه من امه بس كانت قعده تتفرج عليه بالغصب واللي متفرجتش شارك ف الفيلم بصمته وضعفه, اصل الفيلم كان زي القدر تلقيه في كل حته  بتلقيه حتي في بنطلونك, فالجماعه بقا مش عايزه تكون اليومين دول الحزب الاوحد الوحيد السلطوي المتسلط الاوتوقراطي مينفعش يعني الناس لسه منسيتش فيلم الحزب الوطني الفاشل لسه ف الذاكره وف الجروح وف كل حته معفنه ,عمومآ الايام الجايه هي اللي هتتكب وانا اللي هقرأ, الاخوان دماغهم وجعتهم كل يومين واحد يطلع يقولهم انتوا عايزينها دولة اسلامية ويطلع يوميها بالليل نفس الراجل بتاع الصبح بس علي قناه تانية ويقلهم انتوا عايزينها دينية, والكلام الكتير الكبير اللي بنشوفه انا وانت كل ربع ساعة تقريبا, فراح المرشد جمع الرجاله في مكتب الارشاد وقالهم الشغل ده مش هينفع احنا مش عارفين نتحرك, احنا ربنا مش هيخلصنا من الناس ديه ولا ايه (هههههههههههههه اسف والله مش بضحك عليك خالص انا بضحك ع الموقف ده, اصل بيفكرني بمشهد قرأت عنه كتير واتفرجت عليه في رمضان اللي فات في مسلسل الجماعه اول ما النقراشي حل جماعة الاخوان المسلمين وراح الاستاذ حسن البنا اجتمع بالجماعة وقالهم ربنا يخلصنا من اللي احنا فيه, طوالي  فهم عبد الرحمن السندي المطلوب ونفذ اللي المرشد عازه ولمح عنه وخلص الموضوع مشفي استيك شغل فنادق ), ده مش موضعنا عارف بس مفارقة والله وضحكتني, المهم بعديها الجماعة اتفقوا انهم هيدهنوا علي وشهم شوية احمر واخضر ويرشوا شويه بدره من بتاعت الليبرالية والمدنية والحاجات اللي ماشيه اليومين دول في السوق زي العنب, وراحت الجماعة متفقه مع الاحزاب الليبراليه اللي احنا حاطين عليهم سمسم امل علي تشكيل تحالف بقائمه موحده من اجل خوض الانتخابات البرلمانيه الجايه, وبكده محدش يقدر يطلع يقولهم انتوا اسلامية ولا دينية, هما دلوقتي ناش بيس مان بيس وعالم روشه, ليبراليه علي مدنيه واديني فالمحليات ياعمر, نيجي بقا علي الاحزاب في منهم كان ملوش اي لزمة وانا شايفهم اوسخ من الحزب الوطني, علي اقل الحزب كان مفضوح, اما الاحزاب التانيه كانت عاملنا فيها خضره الشريفه وهي اللي خايفه علينا وعلي البلد, ومن ورانا صراعات وخناقات واتفاقات مع الحزب الواطي, علي كام كرسي تشيل, واحنا من ورا دول ومن ورا دول بنشيل علي دماغ ابونا, ف الاحزاب ديه بعد ما الحزب الواطي غار وانحل, دوريت بسرعه علي زبون جديد تعمل معاه صفقة علشان تشوف هتشيل كام كرسي وهتلبسنا كام خزوق, وهي مع الاخوان هتشيل بشكل اشيك بدون تزوير داخل الصناديـ والشغل البيئه بتاع زمان ده  خلاص, فيه ثوره قامت وفيه اساليب وطرق انضج واشيك.

انا هقعد طول اليوم اعيط و اولول ولا ايه, لأ الكلام ده ميكلش معايه, زي ما مبيكلش معاكم, احنا دلوقتي اللي سلطة احنا القوة احنا الحق احنا الشارع وخليهم بقا يتوحدوا ويطنطوا ويتشقلبوا, وف الاخر هيجولي ويرجعولي.............. انا الشعب يله