هو ليه الناس بطالب بالحد الادني هي مثلا فرحانه بالكلمة,يعني كلمة الحد الادني دي شكلها حلو مثلا ونغمتها جديدة, بوليفونيك هي, ولا فضا هوه بعيد عنك, ولا الناس متبتره علي النعمة, ولا ايه بالظبط حد يفهمني يارجاله, انا خلاص هتجن, ساعه تروح وساعه تيجي, ساعه تروح وساعه تيجي.
ولا الناس بطالب بدا, علشان عايزين يبقوا بني ادمين بقا,عايزين يعيشوا عيشه كريمه, عايزين يحسوا انهم ف بلدهم مش في بلد مراة ابوهم,عايزين يدوقوا طعم كلمه انسان وانسانيه علي لسانهم, عايزين يكلوا لحمة كل اسبوع مش كل شهر, عايزين يلبسوا كويس, عايزين يربوا ولادهم تربيه نظيفه ويدخلوهم نوادي ومدارس ويعلموهم احسن تعليم,الراجل من دول مش عايز يرفي بنطلونه المرقع اللي محلتوش غيره, عايز يشتري جديد ياعيني, عايز يحوش القرشين اللي بيخدهم ومبيقدوش معاه يومين, علشان يعرف يدخل ابنه ولا بنته اللي علي وش جواز, عايز يفكر, مجرد تفكير انه يشتري عربيه, مش عايز يحلم, مجرد حلم, انه مجرد يركب جنب واحد زميله شغال في البترول عنده عربيه, عايزين حقهم مــ الاخر, الناس شايفه بلدهم مش عاقر مثلا, الناس عارفه قيمة بلدها ومكانتها وعارفه قيمه نفسها برضه, طب والنبي مش عيب راجل محترم فاتح بيت وعنده عيلين تلاته, ومش عارف ياكلهم, وبنيجي نسال الموظفين ليه بياخدوا رشوة, وليه الحكومة سيباهم وعارفة, يعني اديني عقلك كده, الراجل ابو شنبات اللي شخططته ف البيت بتوصل ل اخر الشارع, هيكفي بيته ازاي, يعني اول ما مراته تقوله عايزه و عايزه وعايزه, هي ياعيني مش عايزه عربيه ولا عايزه شقه ف مارينا ولا عايزه غوشتين دهب, هي عايزه بس تشوف ولادها احسن ولاد ف الدنيا, عايزه تعيش عيشه كريمه, والراجل عايز يعيش عيشه محترمه,عايز اول ما ابنه يقولوا عايز اجيب كتاب يابابا يقوله خد ياحبيبي, عايز اول ما مراته تقوله عايزه مروحه في الصاله يقولها اتفضلي جيبي ياحبيبتي, اتفضلي من فلوسي الحلال, مش عايز يقول لحد تاني يابيه ويا باشا, مش عايز يقف اول ما مديره يعدي عليه ويضربله تعظيم سلام, عايز يكون بني ادم, عايز يكون قدام نفسه وقدام بيته راجل , وده مش هيحصل الا اول ما الحكومه تقدره صح وتعامله انه انسان يعيش ويتعايش, انسان حقيقي بجد مش لعبه, مش صولصال هوه , ماهوه مش شغال لمواخذه عند ابوه ف الدكانه, وفي اخر اليوم ابوه هيديله تفاحه علي قطف عنب ويقولوا خلي بالك من المحل يوله, عقبال ما طلع اريح شويه, لأ الراجل شغال ف مؤسسه اللي هي جهاز من اجهزة دولة كبيرة محترمه , والمؤسسه دي مش هتقيمه بقطف عنب,أكيد,ومش هتقيمه ب بيتضين, ماهو احنا مش بنقايض هنا حضرتك, التقييم دا بيكون علي شكل أجور, علي شكل فلوس, علشان يعرف يعيش ويتعايش, ما احنا فوق قولنا انه المصري انسان و سيد الانس كمان, انا عارف انه الكلمه جديده علي مسامع ناس كتير, ولكن ديه الحقيقه اللي دفنها المخلوع وخلانا زيها جثث, لحد ما الجثث رجع ليها الروح اول ما اتكلمنا وصرخنا ونطقنا ,ونادينا بعداله اجتماعيه واسقاط النظام, فـــ اول ما تيجي الحكومه ترفع مرتبه من 150 جنيه لــ 300 او 400 جنيه, فبكده هي بتهرج, وبتقوله, ياراجل ياقيحه ياللي ملكش لزمه, خد القرشين دول, جيب بيهم شويه عظم وانت مروح ياتيت يابن التيت.
تعالي معايا نشوف الموظف اللي الحكومه بترميله كل اول شهر عظمتين, اسف قرشين, وبتقله يعني اجيب لك فلوس منين, اطبعلك, فتشني فتش فتشني, واللي علي راسه بطحه, والامثله البلدي دي, ولا اظننا قاعدين في غورزه, هقولك انا تجيبي الفلوس منين ياحكومة يا اروبه انتي, بس اصبري عليه شويه, دا انا لسه جاي من الشغل, ومستحلف ما اقوم,الا لما اعرفك انت بتعملي فينا ايه وهتعملي فينا ايه وهنعمل فيك ايه, وهتجيبي الفلوس بتعتنا اللي هي حقنا منين وهتوزعيها علينا ازاي, معرفش انا وزراء ايه دول, وزراء خشب, زي اللي في الشطرنج,ما علينا نرجع لحكايه الموظف, تلقيه بياخد رشوة والحكومة عامله فيها عبده العبيط زي ماقلنا, الحكومة عارفه انه التلتمية او الربعمية جنيه اللي بترمي هم له مش ها يعيشوه يومين علي بعضيهم, والموظف شايف انه مدام الحكومة مش مدياه حقه, هو كمان مش هيدي الشغل حقه, ونسيواٍ الاتنين حق البلد عليهم, وقرر انه ياخد حقه بالطريقه اللي هو شايفها , شغالين في طبونه هما, ماهو لو الحكومة كانت حططت له حد ادني وظبطت له السوق والاسعار وكده يعني,وحطط لوائح وقوانين تراقبه وتحكمه, ولكن ازاي, امال هتزل ف امنا بــ ايه, لحد ما اتنيل و اتعود الموظف علي انه يشحت او يسرق بالاكراه من الجمهور, او يتكاسل ف العمل علشان يوفر جهده ليقوم باعمال تانيه في القطاعات الخاصة الغير رسمية, فلو كانت الحكومه حططت حد ادني محترم لاشخاص محترمين, ساعتها الموظف او العامل اللي كان هيتمسك وهو بياخد فلوس وفاتح الدرج, يتشقلط ويتكعور ويترمي ف السجن ميطلعش منه,. لانه اهان الدولة واهان الوظيفه اللي بينتسب اليها واخطا ف حق نفسه وف حق اهل بيته ويستحق اقصي العقاب, اما الناس اللي هما الجمهور عارفه انه المصلحه مش هتخلص الا لما تدفع رشوه و طبعا اللي بيتمرر دا, معظمه بيكون شغل شمال, غلط يعني, زي البنا علي الاراضي الزراعيه و زي رخص العربيه اللي بتطلع بفلوس وغيرها وغيرها, وفي ناس تانيه بتدفع ياهبل للموظف او للعامل ويقولوا لك دا غلبان ومبيخدش حاجة من الحكومه وعنده كوم لحم, وعايزين يحلوا بقه, يعني من الاخر احنا عايشين في جو شحاته وسرقه واهانه, اول ما الحكومة تعمل في رجالتها كده تبقا بتهينهم, وبيكونوا ساعتها عاملين بالظبط زي المتسولين عند اشارات المرور ولكن في مؤسسات الحكومة بيكونوا علي شكل موظفين, تلقيه علي مكتب مخلع معفن وف اوضه ضيقه معتنه وقاعد علي كرسي رجليه مخلوعة وماسك ف ايده القوله بيشرب منها, وقاعد اخر شياكه الشبشب في رجليه, والفوطه علي كتافه, واطباق الفول والبصل مزين بيهم مكتبه, حاجه تكسف يعني, يعني ولا مرتب ولا مكان نظيف ولا حياه كريمة واهانه ف الشغل و هو بيمد اديه للي يسوا واللي ما يسواش ولو ممدش اديه, هيكون ف البيت نص راجل, وخد عندك اهانات علشان مش مكفي طلبات عياله ومراته وقسط الكنبه, الطلبات المشروعه البسيطه, مد اديه او ممدش هيتهان, سواء في الشغل او في البيت.
هديك مثال حي بيلعب, بيبلط اهوه قدامي علي الشط, تلاقي عندك مهندس في مصلحة حكوميه بياخد 800 جنيه ورئيس مجلس ادارة المصلحة بياخد نصف مليون جنيه, يعني اكتر منه 625 مره, يعني بمقام 625 مهندس, والمصلحه كلها فيها ال 625 دول, يعني الرئيس دا لوحده يساوي المصلحه كلها, طبعا غير الحقد والنفسنه والاحباط اللي بيتوجدوا واللي بيوصلوا لحد الكراهية بسب الفروق الرهيبـــــــــه اللي خلقها غياب العداله الاجتماعية واعدام العدالة في التوزيع وفقد العداله في تكافؤ الفرص, المثل الحي دا, مفهوش ولا عداله ولا اجتماعيه و لايحزنون, لأ.........اسف فيه يحزنون ويتوكسون ويتحرقون, علشان كده المطالبه بالحد الادني, ما ينفعش تتم لوحدها, لازم يسبقها حد اقصي للاجور, لسببين, اولهم لانه دا هيكون المصدر الرئيسي اللي الحكومه هتجيب منه الفلوس علشان ترفع مرتبات المهندسين والموظفين اللي ف الارض, اسف اللي تحت الاض, تانيه حاجه علشان تقلل المسافه بين طبقات المجتمع, متعمليش طبقي عليا وطبقي دنيا وكمان تنسالي انه فيه طبقه اختفت اسمها الطبقة الوسطي, علي فكره الكلام دا, مش كلام اشتراكيه, ولا كلام ناس يسارين, دا كلام ناس بني ادمين.
تعالالى لالي لالي يا حبيبي تعالالي, خد عندي هنا وقعد اشرب معايه كوبايه الشاي دي, واسمع ولحن كلامي, قلنا انه فيه فروق بين الموظفين وبين المديرين وطبيلناها و غنيناها علي الربابة والسمسمية وعلي السلم كمان, طب بالنوسبه للموظفين اللي معاهم نفس المؤهل و نفس الكفاءة ومشتركين في نفس سنين الخبرة ونفس العمل, اديك مثال يابومبو, الموظف اللي شغال ف وزارة التضامن الاجتماعي,انت هتجيبه ولا هتساويه بـ ابن الناس اللي شغال في وزارة المالية, ولا هتسويه بزميله البيه ابن البيه اللي شغال في وزارة البترول اللي جايب نفس تقديره, وشغال والمصحف علي عنيه نفس شغلانته, وممكن كمان يكون بتاع التضامن الاجتماعي شغال اكتر منه, ويجي بتاع البترول ياخد اده عشر مرات, دا طبعا علي اساس انه الموظف اللي شغال ف البترول, جايب البترول من عند امه, اما انا وانت اماهتنا معندهاش بترول, عندها فول, الكلام دا برده ينطبق داخل المؤسسه الواحدة, وبيخلق زي ما قلنا فروق و احتقانات بين المؤسسات وبعضيها وداخل ايضا المؤسسه الواحدة, علشان كده لازم يكون معلوم للجميع, انه الاموال اللي بتدخل كـــ ايرادات من قطاع البترول او من الضرائب او من عوائد هيئة قناه السويس او من او من او من , هي مال عام ناتجه من حقوق عامة في الموارد الطبعية ومن ايرادات المشروعات العامة وليست ملكا لتلك الهيئة او المؤسسه ان تنفق وتبذر من جيب الدولة زي ما هي شايفه, واللي عايز يبذر يبذر من جيب اهله.
جينا بعد البلاوي اللي قولنا عليها, نطالب بوضع حد ادني للاجور,يالهوي علي اللي سمعناه, ياخرابي علي اللي اتقال لنا, انتوا عايزين تخربوا البلد, ده رفع الاجور هيسبب تضجم وعجز في انتاج كذا, زيادة في معدل كذا, وسمعنا كلام كبير من بتوع الاقتصاديين الكبار, فانا بقا مش هجمعكم كده بالصلاه علي النبي, واسيب كل واحد شغله علشان نشوف حل لتغير الحد الادني للاجور بدون تضخم في عضله القلب الوسطي او تضخم في الطحال الامامي, فانا عامل لكم مسودة كده مجمعها منكم ومن اقتصادين واقعيين عن تغير شامل لنظام الاجور الفاسد بن التيت ومن غير ما نسبب تضخم, سامعني ياجماعة, ولا اعلي صوتي,تمام كدا, توني واصلكم , خد عندك هنعمل ايه:-
- لازم الحد الادني يكون كافي لتحقيق حياه كريمة بنت ناس, حد قادر علي مواجهة احتياجات الموظف او العامل من ماكل ومشرب وملبس وانفاق صحي وهكذا, وطبعا المعدل دا هيتغير سنويا علي حسب نسبة التضخم اللي هيتعلن عنها رسميا, علشان الحد ما تترجعش قيمته الحقيقية او قدرته علي شراء السلع والخدمات الحقيقية تفضل ثابته, وزي ما قال وحدد خبراء الاقتصاد علشان يكفي الحد الادني للاجر الاساسي للعامل لحياه كريمة,لازم يكون في حدود سته جنية في الساعة, اي الف ومتين جنيه في الشهر, وده علي اساس اننا بنشتغل ثماني ساعات ف اليوم.
- انه يرتفع الاجر الاساسي للعامل او الموظف سنويا بنسبه 7% وده مقابل للخبرة والاقدمية وكلام الانترفيوهات ده.
- وضع سقف مسلح بسمك 100 سم, اللي هو الدخل الاساسي ب بدلاته ب عمولاته ب حوافزة ب ارباحه ب بابا غنوجه, وده لكل العاملين بالقطاع العام, بحيث يكون اعلي دخل شامل لاي مستوي وظيفي ما يتعداش 15 ضعف الحد الادني للاجر الشامل للعامل في الدولة, وبكده هنوفر فلوش بالزوفه, كانت بتروح ل فئه محدودة من القيادات العليا بنت العليا.
- ماتزدش الحوافز والعمولات والمكافات الشهرية عن 100% من الراتب الاساسي للعامل او الموظف.
- توحيد الاجور الاساسية في القطاع العام وفقا للتوصيف الوظيفي, بدل من التفاوت قليل الادب والغير العادل في دخول العاملين في مهنة واحدة حسب الجهة الحكومية اللي بتقوم بتشغيلهم, وبكده الموظف الكفأ اللي بيشتغل في التضامن الاجتماعي, هيتساوي مع الموظف اللي زيه في قطاع البترول, شوف انت بقا التوفير اللي عايد من التوحيد دا, واللي هنستخدمه في تمويل اصلاح نظام الاجور العامه, ياسيدي.
- ضم اموال الصناديق الخاصة لـ وزارة المالية, ووضع رقابه حقيقة صارمة علي خط مسير هذه الصناديق,لتدخل هذه الاموال الخفيه ف الموازنه العامة, وبكده هيزيد الانفاق العام علي الخدمات كالصحه والتعليم وغيرها من برامج الحمايه الاجتماعية, وهيزيد لتتساوي الاجور, وعبي في حجرك يارياسه.
- يتعمل تسوية لمرتبات العمال و الوظفين القدام, ويكون علس اساس الحد الادني الجديد,بزيادة 5% عن كل عام من الاقدميه, وبحد أقصي 50 جنيه لكل عام.
بعد الكلام اللوز اللي احنا قلناه, هنوفر منين التمويل الضروري لرفع الحد الادني بدون تضخم, وهذا سيتم من خلال اعادة توزيع الدخل, ودا مش هيتطلب اي طبع فلوس, طالما وفرنا اليات حقيقية مفعلة لحماية المستهلك ومنع الارتفاعات الغير منطقية في اسعار السلع والخدمات, فــــــــ علشان نوفر التمويل اللي هنرفع بيه الحد الادني ونغير بيه نظام الاجور, نتبع الاليات اللي جايه ديه, و انا قاعد معاكم اهوه, لحد مانلاقي حل ف الموضوع الجملي دا.
- زي ما قلنا قبل كدا, العدالة, العدالة, العدالة, ايوه العدالة في توزيع مخصصات الاجور في القطاع العام والخاص, ودا عن طريق ربط الحد الادني للاجر الشامل بالحد الاقصي, وعلشان تبقا عداله بحق وحقيقي, بصح وصحيح, يبقا لازم الحد الادني لا يزيد باي حال من الاحوال, يعني لو ابو الهول اتكلم, والزمالك خد الدوري, لا يزيد عن خمستاشر ضعف حد ادني اجر شامل, وبكده هنوفر فلوس بالكوم هتساعدنا اننا نحقق العدالة اللي هي في الاصل اساس السلام الاجتماعي, وسلملي علي الحقد والنفسنه وعلي البتنجان بالمره.
- نشنق الدعم اللي بيروح لشركات بعينها في صورة غاز ومازوت وسولار وبنزين وكهربا, نخنق امه لانه بيتقدم لشركات الاسمنت والاسمدة والحديد و و و, وكل الشركات اللي بالشكل دا, وخصوصا الشركات الاحتقارية بنت الكلب واللي بتحقق ارباح ارقام خياليه, يجي بــــــ, مش قادر انطقها علي لساني, اخاف عليه ياخد علي كده, عموما هي ارقام فيها اصفار كتير فحت, يعني الحكومات اللي المفروض انها تكون شغاله عندنا, بتبيع لهم الموارد بتاعتنا ببلاش, ويروحوا ولاد الجذمه يبيعوه هما لينا ب الاسعار العالمية, هو فيه كلمه و حركه محشورين في بوقي عايزين يطلعوا ولكن علشان انا متربي وانت متربين, ومرضاش انكم تسمعوا الالفاظ دي, انا مش هقولها, بس اتمني انكم تكونوا عرفته انا عايز اقول ايه وعايز اعمل ايه, انا حاسس اننا بنجيب حكومات نشتغل عندها مش هي اللي تشتغل عندنا, بس علي فكره انا ممكن اكون ظالمهم, مش ممكن تكون الارض اللي احنا عليها كانت بتاعت جدهم المرحوم الباشا ابو انجي, اللي معرفش اسمه, علشان كده هما بيبيعوا و بيشتروا و بيقسموا علي مزاجهم, وبيبصونا علي اننا ولاد الريس عبد الواحد, وطبعا لو احنا قلنالهم انتوا بتعملوا ايه يا ولا د التيت, كانوا بعتونا المرستان والريس عبد الواحد كان اتشل وكان كمال يس صاحب علي كسر الكوبايه اللي في ايده, دا عند امه يــ ادهم, دا لو الاجراء دا خدناه حقيقي, الاقتصادين الكبار بيقولوا انه ممكن يوفر يجي عشرين مليار, انطقت عادي, بدون تعلثم, او تهتها, لانهم فلوس حلال, فطلعه بسلاسه.
- نكون واضحين مع بعض, يعني ايه, يعني هنلم ضرايب من المستثمرين والراسمالين وشركاتهم عن جد ومش هنهرج, زي ما كانت الحكومات بتغمي عنيها عن الناس الشيك دي, وبن الناس اللي فيهم كان بيدفع معدلات ضريبية تقل عن 5% في المتوسط, والقانون بيقول 20%, مش احنا عايزينها دولة مدنية, طب بسم الله الرحمن الرحيم في الدولة المدنية هي سيادة القانون, اشتغل بقا ياعم, فممكن نراجع الكلام اللي احنا دا في ادارة كبار العملاء في مصلحة الضرائب, وهنعرف دخل الناس الشيك ولاد الحرامية, واللي دفعوه من ضرائب, و يجوا علي واحد غليان زي وزيك, بعد ما يتهد حيل اهلنا طول الشهر ويقطعوا ويحفوا منه ضرايب, وبكده نكون انا وانت سيدي الغلبان, اللي بنحاسب علي المشاريب, والراسماليين الكبار هما اللي بيشيشه, حتي ما بيخرجوش دخان, الواحد يظبط دماغه شويه.
- نعدل قانون الضرائب الموحد المعمول بيه, لمراعة قاعدة التصاعدية وتعدد الشرائح الضربيه بصورة متناسبة مع المستويات المختلفه من الدخول, هتصدقني, هتصدق ان شاء الله, رئيس مجلس الادارة اللي اتكلمنا عليه فوق اللي بيقبض 625 ضعف المهندس اللي عنده في الهيئه, بيدفع ضرايب اقل من ضعفه, يعني هو بياخد اكتر منه 625 مره, وبيدفع معدل ضريبي اقل من ضعف اللي بيدفعه المهندس اللي مرتبه يجي 0.001 من مرتبه, يعني الراسماليين و البشوات بتوع الحكومة اللي مرمين ف اجهزة الدولة متساوين مع الطبقي الوسطي (دا علي اساس انه فيه طبقي وسطي), في معدل الضريبة عند مستوي 20% علي كل الدخول اللي بتزيد عن اربعين الف جنيه ف السنة وبيكون كده ثابت حتي لو وصل دخل الفرد, اللي هوه بنقوله ياباشا, او ربح الشركة الي مليارات في العام,ومحدش فتك يقولي ما احنا لو بنقلل الضرائب عن الناس ديه, لانه ضروري, لتنشيط الاستثمارات المحلية وجذب الاستثمارات الاجنبية, ما هو الدول الناميه اللي زي حالتنا والمتقدمة اللي مش زي حالتنا, بس هنوصلها ان شاء الله, الدول دي بقا بطبق نظم ضريبية اكتر اعتدالا من النظام الفاسد اللي معمول عندنا هنا في مصر, معرفش احنا ليه كل حاجه بنفتكس فيها.
- تلف العالم تروح يمينه وتطير علي شماله وتقف علي دماغه وتنزل بين رجليه هتلقيه بيفرض ضريبه علي التعاملات في البورصة, والله ياجماعة احنا بني ادمين ومبنكلش لحوم بشر ولا بنمص دم ولا بنطنط علي الشجر وبناكل فول سوداني وموز, احنا بني ادمين زي البني ادمين اللي في اي دولة تانية, طب ليه بنفتكس, ولا هو بيض وخلاص, علشان كده احنا لازم نفرض ضريبة صغيره, علشان ماتزعلش يا ريس, ضريبة صغيرة علي التعاملات في البورصة, تعرف الضريبة دي هتوفر لينا كام, امسك قلبك, وخلي حد جنبك يامسكلك بصليه علشان لو حصلك حاجه يفوقك, هنوفر يجي خمسة مليارات جنية, وعلي فكرة دا قبل ما تكون في مصلحتنا, فهي لمصلحة البورصة لانها هتهدي من سخونه المضاربات, والي تقليل ما يشفطه الاجانب من ارباح خلال المضاربة, واللي ب يسهلها عدم وجود ضرائب علي التعاملات, وكمان لازم يفرض ضريبة علي ارباح المتعاملين في البورصة في نهاية كل عام, ودا عن طريق تسوية المركز المالي للمتعاملين لبيان الخسارة او الربح, ليدفعوا علي صافي ارباحهم ضريبة نسبتها 20% زي بالظبط المستثمرين اصحاب المشروعات التجارية والصناعية,و فرض نفس الضريبة علي المستثمرين الاجانب لارباحهم اللي حقوقها وحولها الي الخارج, ماهو احنا مش قاعدين علي المصطبة, وكل اللي عايز يعمل حاجه يعملوها ويقوم كسبان, يعني قاعد شارب واكل نايم محمي ببلاش, وقبل مايسافر اديله تمثال فرعوني وقاله سي يو سون, وهو بيدني علي قافيه وبيقولي استيوبد يو ار.
- حطلي قوانين كده وشكلهم لي علي ذوقك, علشان نمنع اي فساد في وحدات القطاع العام, ويطحطوا جميع العاملين والجمعيات العمومية ونقابتهم ومجالس ادارتهم لرقابه صارمة, علشان يتحسن الاداء, وعليه الفائض من الميزانية يتحول الي الموازنة العامة للدولة, واللي هنستخدمة في تمويل الحد الادني للاجور, بدل ما كان بيتقسم علي الحرامية كل اخر سنة مالية, والله ياجماعة كنا في مولد وصاحبة غايب.
- تعديل اتفاقيات الغاز الطبيعي للدول الاخري, ما احنا بنصدر ثروة طبيعية مملوكة للشعب كله بالتساوي, مش بنصدر مياه مجاري, مش نروح نبيع الغاز للكيان الصهيوني اللي الشعب كله اصلا مش راضي يبيعله لتر واحد من الغاز, ما هو احنا مش هنورهم بيوتهم وهما يضلموا حياتنا, ولو حتي دفعوا علي التر قد تمنه الحقيقي ميت مرة, ولكن علشان الاتفاقات اللي تمت والمصلحه الوطنيةاللي هي هتكون اساس التعامل من هنا ورايح, يبقا علي الاقل خالص نرفع السعر ليصل الي 13 دولار, ودا السعر اللي اوكرانيا بتديه ل روسيا,علي فكره, والكلام دا برضه يمشي علي الغاز اللي بنصدره ل اسبانيا والاردن, تعرفوا احنا لو فرضنا الاسعار العالمية العادلة علي الدول دي وغيرها من الدول المستورده للغاز دا, هنضيف يجي خمستاشر مليار جنيه كايرادات للموازنه العامة, قابله للزيادة مع تزايد اسعار الغاز, يعني البلد فيها سخط شعبي وقرف من تصدير الغاز لـ اسرائيل, الا ان الحكومات مصممه علي بيعه بدون اي مبرر سياسي او اقتصادي.
- مضاعفة رسوم ضريبه محاجر الاسمنت, لانه الضريبة اللي لسه مفروضه عليهم من قريب, صغيره اوي بالمقارنه مع الارباح الاحتكارية الضخمة موت اللي بتحققها شركات الاسمنت اللي غالبيتها مملوكة للاجانب, والله حرام معرفش ليه هما بيعملوا فينا كده, الحكومة بتعاملنا كده ليه, يمكن تكون البلد دي مش بلدنا, وهما مثلا لـقونا مرمين علي باب ملجأ, فصعبنا عليهم وخدونا نعيش معاهم هنا علي ارض مصر, واحد واحد كده وحياه ابوكم يشوف في كتفه وحمه, يمكن نطلع ولاد ناس او ولاد باشا ويجي يخدنا, ونتعامل احسن من كده, ويخدنا عنده القصر وياكلنا تفاح وفراخ والذي منه, معايا ريال معايا ريال دا مبلغ عال ومش بطال, عقبال ما تدوروا علي الوحمه هرجع تاني لموضوع شركات الاسمنت دي, لو احنا فرضنا ضريبة ميه وخمسين جنيه علي كل طن, وعلشان يكون معلوم للجميع والحاضر يعلم الغايب, انه التكلفة الحقيقة للطن قبل فرض الرسوم دي بتكون متين وعشرين جنيه, اما الشركات ولاد الحراميه, بتبيعه لينا ب 630 جنيه, وبكده بتحقق مكاسب خيالية, فلو الضريبه دي اتلمت هتكون في حدود ست مليارات جنيه في السنه, انا قاعد اقول مليارات, هنوفر من هنا مليارات وهنلم من هنا مليارات وهنجيب من هنا مليارات, دا والله الــ الف وميتين جنيه اللي هما حقنا وبنطالب بيهم حد ادني للاجور حبه صغيره ولعب عيال, دا بعد ثورة 1952 كان الحد الادني للاجور وصل فيما يعادل الف وسبعمائه جنيه, ومكنتش كمان مصادر التمويل اللي احنا ذكرناها فوق متاحه.
- الغلا الغلا الغلا, اسود هباب اسود هباب, هو ايه الغلا الغلا الغلا, واسبابه الرئيسة هي ايه, هي اللي ناتجه من احتكار الانتاج ل احتكار الاستيراد, فاعمل ايه انا لو حكومة, بعد الشر, هوفر السلع المحلية والمستوردة في مجمعات حكومية تكون تحت عنيه, مجمعات واسعة ونظيفه متقلش عن كارفور وهايبر في حاجة, ما هو الناس اللي بيشتروا من كارفور مش ولاد السلحدار باشا واللي بيشتروا من المجمعات الموجوده حاليا ولاد علي الاعرج, كلنا واحد, كلنا انسان, كلنا مصرين, كلنا مصر, وسمعني اغنيه العنب, فالمجمعات الحكومية النظيفه اللي هتتعمل دي تكون تحت رقابه شعبية ومحلية وحكومية ومجتمع دولي, الامم المتحدة بلاش, دي حاجه داخلية ياعم, واحنا مبنحبش حد يفتح التلاجه بتاعتنا, وبكده السلع هتتباع باسعار عادلة ومنطقية, بعيد عن الاسعار الاستغلالية اللي بيفرضها المحتكرون في مجال الانتاح والتجارة, وكمان بالطريقة دي الحكومة هتفرض علي التجار القبول بارباح معتدلة, بدلا من استغلال المواطنين.
- ارفع ايدك لفوق وخد الطلقة دي, في دماغك, في رجليك, في اديك, في قلبك, كفايه كده عليك لتتعور, الحكومة بتدعم الصادرات ب ارب اربع اربعة مل مليا مليارات جنيه في العام, مش قادر انطقها علي لساني ياجدعان, حد يديني بصله من اللي ف اديه يفوقني, وال ايه كمان وزارة التجارة والصناعة طالبة من وزير المالية انه يزود الدعم, الدعم دا رايح لحفنه من الاشخاص بعينهم, متعرف رايح لهم علي اساس ايه, وتلاقي انه الحفنه دول من المصدرين الحراميه هما اللي بيستفيدوا من الدعم وبس, زي وزير التجارة السابق الهارب رشيد, دا غير الراسماليين المتعاونين مع الكيان الصهيوني في مناطق الكويز, واللي بتدخل منتجاتهم للاسواق الامريكية بدون جمارك زي جلال زوربا, يعني بنقدم الدعم اللي من دم الشعب المصري لخدمة الاسولق الاجنبية و الكيان الصهيوني والحرامية اللي عندنا, سمعني نغمه ربابة حزينة وقعدني جنب الترعة ومسكني خمس او ست طوبات, وطول ما انا قاعد, افضل ارميهم في الميه, وانا باصص للحكومة وهي بتقولي دعم الصادرات اولي ولا بيع الغاز ببلاش ل اسرائيل, وانا اقولها لأ مصر اولي, تنمية الصعيد اولي, تنمية الصعيد قيمة الدعم ليها ب ميتين مليون جنيه بس, دعم اسكان محدودي الدخل اولي, اللي قيمته وصلت ب مليار جنيه بس, دعم الادوية والتامين الصحي اولي, اللي بندعمهم ب 421 مليون جنيه, يعني بالصلاه علي النبي كده احنا بنقدم دعم لـ رجال الاعمال, او لـ رجلين من الاعمال ب قيمة الدعم المقدم لـ تنمية الصعيد ولـ اسكان محدودي الدخل و دعم الادوية و التامين الصحي و لـ دعم المزرارعين والحاصلات الزراعية واللي هيتفضل اعمل بيه فرح ل ايهاب بن جلال زوربا.
احنا بقا في كل اللي فات دا جبنا سيرة طبع فلوس, احنا معملناش غير اصلاح نظام الاجور, وتعديل توزيع مخصصات الاجور, ونظم ضرائب جديده, وبكده فرض تطبيق الحد الادني والتغيرات السنوية فيه والعلاوات السنوية المقبله للتضخم, هو واجب لضمان الاستقرار الاجتماعي ولتحقيق حد ادني من العداله في التوزيع الدخول.
وتفضلوا بقبول فائق التحيه والاحترام,,,,,
