الدستور اولآ...............ليه؟, لان النخبة السياسية اللي شايفه نفسها بتفهم واللي بحكم غبوتها عينت نفسها وصية علي الشعب او بالاحري فرضت نفسها و قررت انه الدستور يكون أولآ, بعد ما الناس خرجت وراحت تصوت و وقفت ف الطابور, والله يومها كانوا واقفين كانهم واقفين علي باب الجنة حسوا انهم بقوا بني ادمين,ما اه صحيح الشعب خرج وساح دم اهله ف ايام الثورة علشان نفرين او تلاته يطلعوا يتحكموا فيه بحجه انه لسه نوغه, وهما بروح امهم اللي بيفهموا, ازاي يعني, اه والله هما قراروا كده وشايفين كده, بما اننا شعب ملوش ف الديمقراطية , او زي ما قال احمد دومة انه الشعب المصري غير مستعد للديمقراطية, وزي ما قالها غيره من النخب, انه الشعب غير مهيأ وغير واع وغير مدرك لها, شعب اهطل يعني, كده احنا معانا شهادة رسمية من النخبة المصرية بتقول اننا ملناش لزمة وصوتنا ملوش قيمه وهطل و مش واعين وبنعملها علي نفسنا, أخ خ خ خ افتكرت صحيح انا معايه ف البيت شهاده تانيه من النخب ديه برضه بعد ما ثورنا وخلعنا المخلوع بتقول انه احنا اعظم شعوب الدنيا وشعب واعي بحقوقه ومدرك بواقعة وروح التحرير ألهمته الديمقراطية وممارستها واننا شعب ميه ميه ولا عم زكريا, (يعني ساعة ما الشعب خلع المخلوع كان واعي و ابن لاذينه وساعة ما قال نعم ف الاستفتاء بقا شعب اهطل وبيضحك عليه ومش واعي و ابن كلب) بلا قرف ياشيخ,,, واحد شطورة بقا يطلع لي كده, بس مايكنش من النخبة ويقولي ايه الفرق بين ديكتاتورية المخلوع وديكتاتورية النخبة اللي شايفه نفسها انهم لوحدهم اللي خلعوه. وعلي فكره احنا مش مستنين حد من بره ولا من جوه يطلع يقولنا برافو انتوا شعب عظيم, احنا عارفين اننا عظماء وعارفين كمان احنا عايزين ايه وبنعمل ايه.
البرادعي ف اول امتحان للديمقراطية التي يدعيها خد صفر من عشره, إلا اذا كانت الديمقراطية ف دول العالم الاول النظيفه اللي عاش فيها, غير اللي احنا نعرفها لعلها تكون هناك حكم الاقليه للشعب.
البرادعي انا شايفه انه من افضل المرشحين اللي اتقدموا حتي الان لسباق الانتخابات الرئاسية, وكل ما قعد مع حد من صحابي اقولهم البرادعي البرادعي, دا البرادعي دا راجل متمرس علي الديمقراطية وعارف معانيها لانه عاش وسطيها, دا الحاج دا برنامجه مش هيكون برنامج عادي دا هيكون مشروع قومي, غير معظم مرشحين الرئاسة اللي قرأو عن الديمقراطية ف الكتب وبس, وف اول اختبار حقيقي للمتنورين المتعلمين اللي اتمرسوا علي الديمقراطية وكلوا معاها عيش وملح, عيش وملح ايه ياسيدي قصدي كلوا معاها كافيار وسيمون فيميه, انقلبوا علي الديمقراطية وعايزين آل ايه نعيد الاستفتاء تاني وممكن تالت ورابع لحد ما نوصل لمفهوم الديمقراطية اللي هما عايزينه, مش الديمقراطية الحقيقية اللي طلع انه ولا اللي قرأ عنها ولا اللي اتمرس عليها يعرفوها او يفهموها, والاعفن من كده انهم يطلعوا يقولوا بعد ما خسروا انه الاستفتاء دا كان غير قانوني, طب مادام الاستفتاء ده غير قانوني وغير دستوري ليه لم تتقدم النخبة ومعاهم الجمعية الوطنية للتغير لــ مجلس الدولة ولا لـ مجلس الامن حتي,وتقول انه الاستفتاء دا غير وغير وغير, وتقدم حججها وترتضي بفتوي او توصية المجلس وعليه كان ممكن يتلغي الاستفتاء ومكنش اتعمل, ياجدع دا انه ليلة الاستفتاء ديه معرفتش انام, كنت عامل زي العريس اللي دخلته بكره ومتبرجل وملخبط, ولا بعد ما خسروا وسعيهم خاب, عيطوا وخرجوا من المتش, وقالوا والله ما حنا لاعبين معاكم, انتوا اصلا ما بتفهوش واحنا غلطانين اننا رضينا نلعب مع ناس بيئه و مبتفهمش زيكم, وايه ياريس خدوها جري من بيتهم للجنة الفتوي والتشريع بمجلس الدولة ليتقدموا بدعوي تقضي بإجراء التعديلات الدستورية قبل الانتخابات البرلمانية والرئاسية للالتفاف على نتيجة الاستفتاء الأخير الذى أجرى فى شهر مارس الماضى، والمسفر عن موافقة الشعب على إجراء الانتخابات البرلمانية أولاً قبل التعديلات الدستورية, والادهي والامسخ بعد ما انقلابهم فشل, رجعوا يقولولك طب خلاص نعمل مواد فوق دستورية علشان نضمن انه بغض النظر عن اي فصيل سياسي يكسب الانتخابات مينفردش بوضع الدستور ويخليه منسجم ومتوافق مع منهجيتة واستراتجيتة وكده يعني, طب ما يعملوا دستور هما وخلاص , والنبي ياحبايبي حد هنا يقولي ايه المواد الدستورية اللي الفصيل اللي هيكسب هيحطها او المواد اللي ممكن يلعب فيها اويشيلها, يعني الدستور الجديد مش هيجيب مواد جديدة او عبقرية والاكيد انها هتكون ذو وفاق واجماع وطني, والدليل علي كلامي الوثيقة اللي الدكتور البرادعي قدمها, والله هي هي المواد اللي ف دستور 71, مفهاش جديد يعني, يعني الخوف من انفراد فصيل لوضع دستور ديه فزاعة وماشية ف السوق, وانا كلتها علي فكره, يعني بالنسبة للمواطنة وحقوق الانسان و وضع الجيش والشرطة والمحكمة الدستورية ومجلس الشعب,,,, الي اخره, ديه مش هتلاقي عليها اختلافات جوهرية....ومن الاخر النخبة خايفه انه الاسلامين يكونوا الاغلبية في مجلس الشعب وبكده هما اللي هصيغوا الدستور ومن الاكيد انهم هيضعوا الهوية الاسلامية في جميع القوانين والمواد, دا غير موضوع المادة الثانية, لان الامر اكبر من المادة الثاني, الامر متعلق بتحكيم الشريعة الاسلامية, الصراحة حلوة صح, عايز تضحك خد ديه, قول للنخبة كده انتوا عايزين تعملوا جمعية تاسيسية لوضع دستور جديد ازاي, هيقولوك بالانتخاب, طب اديني عقلك الناس اللي هتقدر تكسب ف انتخابات وتحصل علي اغلبيه فيه, مش هتقدر ترشح رجالتها ف الجمعيه ديه والشارع اللي كان هينتخبهم ف البرلمان هوه هوه برده اللي هينتخبهم ف الجمعية التاسيسية............هارش
ويطلعلي الدكتور عصام شرف رئيس حكومة تسير الاعمال ويقولي الدستور اولا, تسمحلي يادكتور عصام, اقولك وانت مالك, الكلمتين دول تقولهم وانت ف البيت او ف النادي مع اصحابك او مع عائلتك ف محل فول, اما انه الكلام دا يكون علي المواقع والصحف الرسمية, فدا غير مقبول, لانك ف الحاله ديه بتتكلم بلسان مجلس الوزراء الموقت الميسر للاعمال المحايد امام جميع الفصائل والقوي السياسية, والكلام دا برضه للدكتور القانوني الفقيه يحي الجمل اللي بحبه اوي وبحترمه. قبل ما قفل النقطة ديه نسيت اقول انه فيه حاجة اسمها استفتاء بعد ما الدستور يصاغ هينزل للشعب يصوتوا عليه وهيكون لهم الحق ف قبوله او رفضه, وكمان عايز اقول هنا انه احنا بنطالب من دلوقتي اهوه انه التصويت يكون علي فصل فصل, مش الدستور كله شيله واحده.
استنوا عندي كلمتين عن عمرو بيه موسي علشان محدش يطلع يقولي انت انت اتكلمت عن البرادعي علشان عمرو موسي دافعلك, ماهو للاسف هي ديه النغمه اللي شغاله اليومين دول, وده اقل واجب, دا انا ممكن اتخون واتكفر كمان.
عمرو موسي, سبحان الله وكاننا قمنا بثورة علشان عمرو بيه موسي يبقا رئيس الجمهورية, طب مادام عمرو بيه كان شايف فـ نفسه القدرة ع حكم مصر ليه موقفش وقفة رجاله زي كتير من المصرين وقال لا للتعديل المادة 76 من الدستور البائد مادام هو شايف انه المادة ديه مع غيرها من المواد اللي اتعدلت معاها تهين وتذل كرامة الشعب المصري وتصطفي من الشعب المصري كله شخص واحد اللي هو بن الاكابر من الشعب كله اللي ام غسالة, ليه الباشا مقلش كلمة حق ولا كان عنده الشجاعة انه يقول بصوت عالي لالالالالا علي التعديلات الدستورية بتاعت سنة 2005 ف الدستور المرقع والتي كانت ل تفني الشعب المصري وتضع مقدراته اما شخص واحد وكأن ال 80 مليون مفهومش راجل واحد, لبسونا الطرح ولاد الجزمة علشان حطه عيل بشخه, بس احنا طلعنا رجالة ولاد رجالة وهنلبسهم البدلة الحمرا,احنا ياعمرو بيه الشعب المصري الذي تنتمي معاليك له, الشعب الذي انتظرته ان يخرج ويثور ويقتل منه الالاف ويجرح منه عشرات الالاف لكي يطيح بنظام الامبارك ويسقط الدستور الذي شاركت بصمتك في صياغته,
عمرو بيه دبلوماسيتك مدخلتش علي الشعب المصري الاصيل, اللي بيها كنت عايز تحافظ علي نفسك وعلي منصبك ومتقفش قدام مبارك تقولوا انت بتخرف ياريس وف نفس الوقت تضمن حب الناس.
ليست هناك تعليقات:
إرسال تعليق