المجلس العسكري يرشح المستشار عبد الستار ابو العز لرئاسة مجلس الدولة, طب استنوا الناس تنسي ولا يجيلهم بلاا اسود يخدهم في داهية لو انتوا عايزين, رجعنا تاني نرشح ونزكي ونوصي والكلام الكبير ده, مش كنا خلاصنا خلاص ونضفنا وقلنا هننتخب, هننتخب في كل حاجة في الجهاز والهيئة والوحدة والمحافظة والنادي ده الامر كان هيوصل للبيت ياجدع , طب بجد كنتم انتظرتم خمس او ست سنين كنا نسينا فيهم اننا قمنا بثورة ومات مننا اللي مات وكده يعني, ولا انتوا شايفنا هبل مثلا او عبط او حاجة زي كدة, لا بجد فيه ايه هو احنا قمنا بثورة ولا قمنا علي نفسنا, حد والنبي يقولي لكون عايش في وهم ومعيش نفسي فيه, وياعيني عليه ويطلع انكم واخدني علي قد عقلي, ده حبه حبه تقول لي انه جمال مبارك هيترشح لرئاسة الجمهورية وقبضوا علي الثوار والاحرار والناس بتوع المدنية والليبرالية والاسلامية والتحرير دول وهما دلوقتي محبوسين في سجن المزرعة وكمان يطلع بكره ولا بعده اسامة سرايا او ممتاز القط ويقول شفتوا كرم مبارك كانوا ممكن الولاد دول يروحوا سجون وادي النظرون او سجن الفيوم ولكن لسعه صدر السيد الرئيس المبجل الوالد الاب الاخ الاكبر المعلم الوفي مبارك........ الي اخره, وكان ممكن كمان كانت تلسع معاهم ويكملوا السطر ب الرحمن الرحيم, تلسع ليه مهم عملوها قبل كده, (طبعا لكان هيروحوا المزرعة ولا الفيوم كان واحد واحد هيتشمت ويتشحور ويتعدم علي اخر النهار)....... ما علينا احنا مش ضد المجلس العسكري ولا حاجه, احنا ضد الاسلوب والطريقة اللي بيتعامل فيها مع مطالبنا وطلبتنا, والنبي اي حد يبلغ الناس اللي فوق (المجلس العسكري يعني) ان الشعب خرج يوم 25 علشان واحد اتنين تلاته, ف الواحد والاتنين والتلاته دول لازم يتنفذوا ومحدش يقربلهم يكونوا كده حاجة مقدسة , الكلام الجاي ياصحبي متوجه لينا, مش انا وانت بس, انا قصدي المجلس العسكري واللي هيجي بعدهم واللي بعد اللي بعدهم اللي لا بيقروا التاريخ ولا بيتفرجوا عليه ولا بيسمعوا عنه , ده والنبي لو التاريخ طلع ورقصلهم وقالهم انا اهوه وانت اهوه والزمن اهوه بينا اهوه, هيردوا عليه ويقولوله هيه الكوره فين, ياحاج يامعلم يادكتور ياسياده اللواء يافندم ياحضرتك يامعاليك اللي ما يقرا التاريخ واللــــــــــــــه بيتمثل فيه.وصلت المعلومة ولا عايزه زقة.
مطالب الثورة هي بالبلدي كده القضاء وردم واقصاء ومنع وجرف واعدام كل الحاجات اللي الناس كانت مخنوقة منها واللي زرعت وسطينا القرف والجهل والنفاق والوسطي والرشوة ....................الي اخره, الحاجات ديه تتعدم ويتردم عليها بجير حي ويتف عليها وقتي, المطالب ديه تتحط في وثيقة وتتعلق علي باب مجلس الوزراء او تتنقش علي سلسله وتتلبس في الرقبة بالعربي كده تتحفظ زي القران والانجيل, فتعملولي قانون, تتشقلبوا مليش دعوة انا ليه انه اللي انا عايزة يتنفذ اللي خرجت علشانه يتنفذ اللي الناس مات واتصابت علشانه يتحقق وإلا وربنا المعبود لكون في التحرير بعد نص ساعة ومعايه خيمتي ب لاب توبي بسلطاتي, وابقا قومني بالطبل البلدي يافندم
ليست هناك تعليقات:
إرسال تعليق